Intanto che metevo a posto la libreria dove che go tante publicasion su Venezia, se saltà fora sto libreto de quaranta pagine
- Dettagli
- Categoria: Cultura
“Travagli ed affanni dei medici condotti del settecento nella Repubblica veneta” che gavarà forse sento ani, e che conta de tante questiòn che riguardava i Medici Condoti dea Republica de San Marco atorno al mìesetesento.
Albano Bidasio Degli Imberti 9.10.2021 su Conegliano forever
Pensando a tuto quel che se parla ogni momento sue cure e sul funsionamento dei dotori de fameja, salta ai oci come che no soeo a Venesia, ma in tuti i Teritori dea Serenisima, fin da quei tenpi ghe gera dei publici sanitari, in parte sovensionadi dal governo, che operava co regoe precise fisade dae legi.
Legi che riguardava le diverse categorie, dei dotori, dei spesiai e dei chirughi e che fisava le conpetense, i limiti teritoriai e operativi e in qualche maniera anca le tarife fisade drìo deée posibiità dei pasienti.
Par otener na Condota ocoreva tanti ani de studi costosi par l'abilitasiòn medica e tanti ani de pratica, ma anca qualche bona racomandasiòn de persone potenti.
E dopo bisognava tegner na vita decorosa, na casa dignitosa co un anbulatorio, vestirse in maniera distinta, procurarse libri e tratati e provederse de gondoea e caval par le visite ai malai. Par questo i diseva:
“ Non v'ha per l'uomo schiavitù più forte
del medicare in pubblico servizio “
Gera na vita conplicada co tuti sti oblighi sociài che ciamava tante spese e senpre, co se parla de schèi, salta fora motivi de contrasto soratuto par geosìe, sconfinamenti teritoriài o scavalcamento dee diverse conpetense fra dotori, spesiai e chirurghi.
Par fortuna funsionava in tuto il teritorio dea Republica na organisasion gerarchica de verifica dee atività sanitarie a vari livèi che, oltre a definir ogni aspeto dea profesiòn, controlava l'opera dei singoi sogeti dee diverse categorie e giudicàva née situasiòn de contrasto.
Go caro de riportàr un interesante esenpio de sta atività de control e de giudisio par na question nata fra un dotor e un spesial.
Naturalmente el testo el se scrito in talian antico, co paròe che no se dopra pi, e par questo preferiso contar ta storia nel nostro diaéto veneto.
La question la scominzia da na letera del 19 aprìe 1775 che el Protomedico (Na spece de Ministro dea Sanità) ga mandà in quaità de consuente tecnico ai Proveditori dea Sanità.
El Protomedico conta che se rivà a casa sua in piena note un servidor mandà del Ricevidor de Malta (Masima autorità del Fisco) parché la cognada par prescrisiòn del medico la doveva eser curada co late de muséta, dato che quel de vaca gera masa pesante par ela. Sicome che el spesiàl che stava davanti aea cesa de San Giovani e Paolo tegniva in te na staéta do musete, i se ga meso dacordo che el so servidor sarìa pasà la sera pa eser presente co lo monseva e ritirarlo. Però el servidor nol ga trovà el spesial, che gera a dormir, ma un so aiutante, che ghe ga dito de spetar in botega e che sarìa andà lu a monser. E servitor parò nol se ga fidà, ghe se andà drio de sconto e ga visto che le muséte le dormiva destirade e che staltro el gera drìo travasar del late drento na fiascheta da na bocaéta. Sto late gera anca fredo e alora el servidor che gavea capìo sto inbrojo ga portà a fiascheta al Ricevidor de Malta, che co lo ga asagià ghe se parso che no fuse late de muséta e gavarìa poduo far dano al'inferma.. Par sicuresa lo ga mandà a un perito par conferma. Co tuto che gera la matina de Pasqua, el perito lo ga anaisà e sagià e ga scrito na dichiarasion che no se late de museta.
“ In chasa del ill. Protto Medicho Paiton hò esaminatta
io sottoscrittoquesta matina una carafina di late, sema
due dite e con dito mio giuramento atesto che il deto late
non era late frescho né era late di asinella.”
“Florian Marzoran”
Se pol veder come che nea Serenisima se tegniva da conto la salute dei citadini e se vardava co atensiòn sua quaità dee medesine. E ste atension no gera solo pai parenti dei alti funsionari, ma par tuto el popolo, come altri esempi che se trova su sto libreto.